ГРАЃАНСКА ИНИЦИЈАТИВА ЗА ЗАЕДНИЧКА МАКЕДОНИЈА ПОВИКУВА НА МАРШ: Да не се прифаќаат платформи создадени за туѓи интереси

На прес-конференција прогласот го претставија Игор Дурловски, Александар Русјаков, Борис Дамовски, Елена Мисиркова и Богдан Илиевски од Граѓанската иницијатива за заедничка Македонија

Граѓанската иницијатива за заедничка Македонија денеска објави проглас со кој се бара од политичките партии да го почитуваат Уставот на Република Македонија и да се обврзат дека нема да работат на промена на името и суштината на нашата држава.

- Македонија е модерна граѓанска република. Македонците, Албанците, Србите, Ромите, Бошњаците, Турците, Власите и другите живеат во единствената матична држава на македонскиот народ, кој сѐ уште во 21 век е соочен со негирање и дискриминација. Бараме ниту една политичка партија во Македонија да не ја потхранува и уважува дискриминаторската политика на одредени земји - се наведува во прогласот.

На прес-конференција прогласот го претставија Игор Дурловски, Александар Русјаков, Борис Дамовски, Елена Мисиркова и Богдан Илиевски од Граѓанската иницијатива за заедничка Македонија.

Мисиркова повика за семакедонско, сеграѓанско помирување и смирување на страстите за, како што рече, да го осознаеме она што е виш интерес за сите оние што живееме и твориме за и во Република Македонија.

Дамовски рече дека иницијативата ќе биде спроведена со мирен граѓански марш денеска во 17 часот пред Владата на Република Македонија.

- Ова е повик до сите граѓани на Република Македонија. Ги повикуваме сите учесници да се приклучат на мирен, достоинствен и неисклучувачки начин да ја искажат својата тивка демократска волја - изјави Дамовски.

Добредојдени се сите, посочи тој, сѐ додека не се истакнуваат политички и верски симболи, како и да нема шовинистички и навредливи пароли.

Во прогласот, исто така, се бара ниту една политичка партија да не прифаќа платформи создадени за туѓи интереси, во туѓи држави, без изборен легитимитет чија цел е разнебитување на Македонија каква што ја знаеме. Уставот на Република Македонија, како што стои во прогласот, е јасен и прецизен во однос на многу прашања кои се однесуваат на македонскиот идентитет и од него не се отстапува.

Извор: “Телеграф.мк“