Чедомир Ненковиќ

На денешен ден 2014 година, на 55-годишна возраст починал познатиот македонски фоторепортер Чедомир Ненковиќ. Професионално се занимава со фотографија од 1980 година кога почнал да работи како фото-дописник за загрепски “Вјесник“, а подоцна работел во македонските дневни весници “Вечер“, “Дневник“ и во неделниците “Пулс“ и “Дневник 7“. Соработувал и со странските новински агенции Танјуг, Ројтерс, Асосиед прес и ЕПА. Роден бил во 1958 година во Битола.

Петар Костов

На денешен ден 2013 година, во 84-та година од животот починал писателот Петар Костов. Бил член на ДПМ од 1971 година. Роден бил во Битола во 1928 година. Работел во Македонската радио-телевизија. Оставил богат прозен и драмски опус. Автор е на книгите “Бог да го прости Чарли“, “Пак кукуригат црвените петли“, “Кулата“, “Црвен дожд“, “За виното, водата и Анѓелија“ и други.

Димитар Митрев

На денешен ден 1976 година, во Охрид умрел Димитар Митрев, македонски литературен критичар и есеист, публицист, академик, професор на Филолошкиот факултет во Скопје. Негови познати дела се “Пиринска Македонија во борба за национално ослободување“, “Вапцаров“, “Критики и огледи“. Роден бил во Деде Агач на 14 октомври 1919 година.

ДЛУМ

http://dlum.mk/home/

Формирање на Друштвото на ликовни уметници

На денешен ден 1946 година, во Скопје, на иницијатива на македонските уметници Никола Мартиновски, Лазар Личеноски, Димо Тодоровски, Здравко Блажевиќ, Борко Лазески и на други, било формирано Друштвото на ликовните уметници на Македонија (ДЛУМ).