СИБИРСКА ЦРВЕНКАПА

Девојче-херој: Минала 8 километри низ шума полна со волци за да ја спаси баба ѝ

Четиригодишната Саглана Салчак од Сибир направила неверојатно херојско дело: сама пропешачила осум километри низ тајга полна со волци за да стигне до лекарска екипа и да ги замоли да дојдат во селото и да ѝ помогнат на нејзината болна баба.

Саглана, која веќе го доби прекарот Сибирска Црвенкапа, живее со слепиот дедо и болната баба во мало село во Тува, кое е оддалечено од цивилизацијата.

Кога стигнала до болницата во најблискиот град, докторите морале првин нејзе да ѝ пружат помош поради хипотермија предизвикана од непрестајното пешачење на минус 34 степени Целзиусови. Откако се погрижиле за девојчето, се упатиле кон селото, но, за жал, стигнале предоцна, бабата веќе била почината.

Докторите биле зачудени како малото девојче не било растргнато од волците.

- Не бев исплашена, само бев многу гладна и загрижена за баба ми. Беше многу ладно, ама не смеев да мислам на тоа. Само одев, одев и одев – вели малата хероина, кој во шумата преминала и преку замрзната река.

Семен Рубчов, шеф на спасувачката служба во Тува, вели дека малата Саглана имала луда среќа.

- Тоа е девојче кое потекнува од фамилија која со децении чува овци, па од мала е научена да се снаоѓа во шумата. Навикната е на екстремни ситуации, ги знае опасностите на тајгата и знае како да ги избегне. Сепак, таа има само четири години и факт е дека имала луда среќа. Мечките се среде зимски сон, ама волците можеле да ја растргнат на секој чекор – вели Рубчов. 

Извор: “Нова Македонија“