„Танец“ промовираше две нови аудиоизданија од едицијата „Незаборав“

Директорот на „Танец“ Зоран Џорлев на промоцијата рече дека како и во претходните четири изданија, и овие содржат по 19 композиции и најави дека „Незаборав“ ќе продолжи со следни изданија се додека, како што рече, не бидат исцрпени сите композиции

Дваесет и осум македонски изворни народни песни и десет традиционални ора содржат двете нови аудиоизданија, петто и шесто, од едицијата „Незаборав“, која од 2011 година ја реализира aнсамблот за народни игри и песни на Македонија „Танец“ со поддршка на Министерството за култура.

Меѓу новообјавените песни се „Невесто, црвен трендафил“, „Девојче, девојче“, „Жетварски песни“, „Ја излези стара мајко“, „Филипо моме“… како и „Правото“, „Мајското оро“, „Падарското оро“, „Сватовското оро“…  Со нив вкупниот број објавени композиции достигна 114, од кои 85 се вокални изведби, а 29 инструментални композиции, снимени на лонгплеј плочи во 50-тите и во 60-тите години на минатиот век и објавени од повеќе издавачки куќи.

Директорот на „Танец“ Зоран Џорлев на промоцијата рече дека како и во претходните четири изданија, и овие содржат по 19 композиции и најави дека „Незаборав“ ќе продолжи со следни изданија се додека, како што рече, не бидат исцрпени сите композиции.

– Тука се застапени солисти, дуети, триа, машка пејачка група, женска пејачка група, мешана пејачка група, народен оркестар, изворен и чалгиски оркестар… Се надевам дека и овие, петто и шесто издание, ќе ја збогатат фонотеката на многу љубители на македонската народна музика, а на младата генерација ќе и послужи за пример како треба да звучи и да се интерпретира македонската народна музика, рече Џорлев.

Соопшти дека Оркестарот сега е зголемен и има 19 членови и дека им недостига инструментот канон, но добиле ветување дека наскоро ќе им биде набавен и го очекуваат. Најави и снимање цеде на а капела композиции на машката пејачка група.

Министерката за култура Елизабета Канческа-Милевска рече дека едицијата „Незаборав“ ја покажува грижата за македонското музичко наследство и фолклорно богатство кое, рече, длабоко го одразува идентитетот и историјата на македонскиот народ. Нагласи и дека „Танец“ со своите настапи и гостувања низ светот е меѓу најголемите амбасадори на македонската култура и таа мисија ја исполнува седум децении.

– „Танец“ одигра историска мисија и докажа дека Република Македонија со својата богата етнокореолошка традиција зазема маркантно место во семејството на народите кои ја споделуваат својата богата култура со целиот свет. Во таа смисла, овој проект е своевидно сведоштво за исклучително плодотворните резултати на ансамблот „Танец“ во собирањето, негувањето, зачувувањето, надградувањето и афирмирањето на нашите културни вредности кои се наше национално обележје. Овие музички изданија се потсетник и патоказ за многу идни генерации, како да се сака, почитува и чува сопствената традиција, култура и држава, истакна Канческа-Милевска, додавајќи дека Министерството за култура и во иднина ќе продолжи со поддршката за зачувување на богатото македонско нематеријално културно наследство.

На промоцијата настапи Изворниот оркестар на „Танец“ кој го отсвири „Мајско (Велигденско) оро“, како и женската и машката пејачка група кои ги изведоа „Легнала Дана“ и „Помниш ли, либе, Тодоро“ придружени од Оркестарот на „Танец“.

Извор: “Неделник Република“