Илинден #4 –Граѓанска иницијатива за Заедничка Македонија
ДЕН ПЕТТИ
3 март 2017 година

Почитувани сограѓани, почитувани граѓани на Република Македонија, кои што сте денес по петти пат овде со нас. Да ги одбраниме суверенитетот на нашата земја, да ги повикаме сите ценети членови на политичките партии да ни се приклучат да го одбраниме натпартискиот интерес, бидејќи единствена партија, единствена која може да ја имаме е Република Македонија. Ги повикувам нашите собраќа Албанци, кои што се наши, македонски Албанци, да ни се приклучат заради тоа што ние со нив го делиме соживотот овде. Значи, ни недостасувате во тоа да ја одбраниме нашата Република од странски влијанија, вие треба да живеете со нас, вие не живеете во Косово, не живеете во Албанија, ве молиме, ве покануваме, најљубезно, да ни се придружите овде, заедно со нас. Сите заедно треба да си ги одбраниме интересите, сите заедно треба да направиме едно општество подобро за живот, за сите нас без исклучок. Сите оние кои се недобронамерни ги повикувам да го исправат своето срце, сите оние кои што имаат некаква недобра намера и погрешно известуваат за нашиот мирен протест ги повикувам да се ослободат од својата фрустрација. Со љубов која што им ја нудиме ние сакаме да ги ослободиме од тоа да ја испразнат чашата на гореч и отров, за да се отворат за нови содржини, за да бидат овде со нас, да ги делат нашите постулати. Сега се надевам дека може да тргнеме и денес, по петти пат, сите заедно, испраќајќи му најсрдечна благодарност на нашиот претседател, господинот Ѓорѓи Иванов, кој што е за нас институција со сета должна почит. Ве поканувам да тргнеме. Ви благодарам многу за вашето многубројно присуство денес.

Елена Мисиркова – пијанистка и правнука на Крсте Петков Мисирков, пред Владата на Република Македонија